ئۆپۆزیسیۆنی سووریا چەند گەڕەكێكی دیمەشقی كۆنترۆڵكرد
ئۆپۆزیسیۆنی سووریا چەند گەڕەكێكی دیمەشقی كۆنترۆڵكرد 19.03.2017 | 15:45

ئۆپۆزیسیۆنی سووریا هێرشێكی بەرفراوانی كردە سەر دیمەشقی پایتەخت و چەند گەڕەكێكی رۆژهەڵاتی ئەو شارەیان كۆنترۆڵكرد.

رۆژی یەكشەممە 19-3-2017 ئۆپۆزیسیۆنی سووریا لە غوتەی رۆژهەڵاتەوە دەستی بە هێرشێكی بەرفراوان كرد بۆ سەر پێگەكانی سوپای سووریا و، چەند گەڕەكێكیان لە باكووری رۆژهەڵاتی دیمەشق كۆنترۆڵكرد.

محەممەد شامی، فەرماندەی سەربازی لە سوپای سووریای ئازاد، لە لێدوانێكی رۆژنامەڤانیدا رایگەیاند "دەستەی رزگاركردنی شام بە هاوكاری چەند گرووپێكی ئیسلامی لە سوپای سووریای ئازاد ئۆپەراسیۆنێكی دەگمەنیان لە دیمەشق ئەنجامداوە، بە هۆیەوە ناوچەیەک لە گەڕەکی عەباسی و گۆرەپانی عەباسیان كۆنترۆڵكردووە. هەروەها لەو ئۆپەراسیۆنە رێگای ئوم حوشە و رێگای گەڕەكی فەیحا دیمەشقی و رێگای ئۆتۆسترادی نێودەوڵەتییان كۆنترۆڵكردووە، كە دەچێتەوە سەر رێگای دیمەشق-حمس".

بەگوتەی چالاكڤانانی ئۆپۆزیسیۆنی سووریا، لە گەڕەكی جوبر دیمەشق فەیلەقی رەحمان و دەستەی رزگاركردنی شام هێرشێكی گەورە و فراوانیان كردووەتە سەر پێگەكانی سوپای سووریا و بەربەستەكانی نێوان هەردوولا تێكشكێندراون، بە هۆیەوە كوژراو و بریندارێكی زۆر لە ریزەكانی سوپای سووریا هەیە.

لە لایەكی دیكەوە، میدیاكانی سەر بە حكومەتی سووریا بڵاویانكردەوە، كە چەند چەكدارێك لە بەرەی کارگەی كراش لە گەرەكی جوبر هێرشیان كردووەتە سەر سوپای سووریا، ئەوەشی بە پێشێلكردنی ئاگربەستی نێوان ئۆپۆزیسیۆن و حكومەتی سووریا وەسفكراوە.

بەپێی زانیارییەكانی رۆژنامەی وەتەنی سووری، چەكدارانی ئۆپۆزیسیۆن تونێلێکیان بەئاراستەی كۆمپانیای كارەبا لێداوە و دواتر هێرشیان كردووە. لە بەرامبەردا تەلەڤزیۆنی فەرمی حكومەتی سووریا رایگەیاند، شەڕ بەردەوامە و رەتیكردەوە، ئۆپۆزیسیۆنی سووریا هیچ پێشڕەوییەكی لە دیمەشق كردبێت.

هێرشەكانی سوپای سووریای ئازاد هاوكاتە لەگەڵ یادی شەش ساڵەی دەستپێکردنی خۆپیشاندان و گرژییەكانی سووریا، كە بە شۆڕشی سووریا ناسراوە. تاوەکو ئێستا نزیکەی 500 هەزار کەس کوژران و ملیۆنێکیش برینداربوون. نیوەی خەڵکی سووریاش ئاوارە و دەربەدەر بوون و بەشێکیشیان لە وڵاتانی دیکە بوونەتە کۆچبەر و پەنابەر.
BA PARASTINI KURDISTAN BIBETE FERHENGI HEMUMAN
Copyright © 2015 All Right Reserved Kurdistan Tv